Gadis macan (manis dan cantik)

Komunitas WawaLuhan

11 Oktober

Bismillaah..kembali findi pop hadirkan kisah cinta..

Gadis macan (manis dan cantik)

(Utuh nang imbah bulik sakulah pina galau dijalanan bapandiran wan amat)

Utuh:asli sial banar,hanyar di servis kandaraan samalam,maka muguk pulang,aur babaik haja tatunggang kada mattai,timbul bajalan tulak kasakulahan..

Amat:gaibnya tuhlah,dimana garang ikam manyervis samalam tuh..

Utuh:wadah abah ijum..

Amat:(takalipik)lingu cucukkai bangai pulang kandaraan,mambaiki kandaraan wan abah ijum,bisa kada inya..

Utuh:maka inya ahli servis jua mat..

Amat:amun manyervis payung,inya bisa,mun kandaraan disurung,mahancur maka iya..

Utuh:iihlah,mandai mamasang baut haja taputar mangalilingi kandaraan,kada tadapat mambulikakan ka bakas..

Amat:abah ijum tu,bakantut haja bingung sidin,mengenali macam baunya hahaha..

(Pas batatawaan,malihat buahannya binian lagi bakunyung,pas batimbul pada banyu maurai rambut)

Utuh:wuiiiiiiih ada ciwi macan..

Amat:ckckckckck ini raja ciwi..

(Hancap turun kabatang banyu buahannya)

Utuh:hai ciwi..(Managur)

Ciwi:huuuuuuuuuuy..

Amat:(takalipik)akay huuuy jey hahaha..

Utuh:hehehe,ding pian tahulah kanapa banyu sungai ni kada pernah bening lagi..

Ciwi:nah kada tahu ulun,kanapa ka..

Utuh:sebab semua nang bening sudah melekat di tubuh dan matamu yang indah sayangai hahay..(Manggumbal)

Ciwi:oh so sweet..

Amat:ding pian tahulah kanapa ilung akarnya kada tapi rigat lagi..(Niat handak manggumbal jua)

Ciwi:kada tahu ka ai,kanapa ka..

Amat:sebab samuaan sudah bakumpul jadi kayakih dikapala pian sayangai kikuk kikuk..(Himung)

Ciwi:(takalipik)beuh lingunya, mahinakah manggumbalkah netu..(Sarik)

Utuh:macam macam haja ikam ni mattai,gumbalan salajur hapakan gasan aluh di pakai jua..

Amat:netu haja nang ku hapal tuhhai..

Utuh:ding siapa ngaran pian sayang,ngaranku utuh d caprio..

Amat:amun aku dingai, amat stallone..

Ciwi:wuiiih ngaran uki,tapi tampang kaya perkedel lalu mauk hahaha..(Mangakak)

Utuh:(takalipik)beuh curut dihapaknya..

Amat:(takalipik)akay dihapaknya..

Ciwi:mun ulun sheila ka ai..

Utuh:wew sheila-senang nang lamak hahaha..

Sheila:(takalipik)beuh mambalas inya..(Masam muha)

Amat:sheila,kanapa pian pina katuju banar barandam..

Sheila:ulun lagi bamainan ka ai wan kawan ulun..

Amat:haw mananya kawan pian beibh..

Utuh:tahu sheila nih,ada ada haja,mulai tadi saurangan haja kulihat barandam..

Sheila: nih kawan ulun..(Baangkat awak)

(Liwar takajut utuh wan amat malihat sheila manggindung buaya)

Sheila:(takalipik)homa buaya,hiiih ngeri..(Kabuliyangan bukah banar)

Amat:(takalipik)akay ada buaya,hiiiih atuuuuut..(Mamparapas bukah)

Sheila:beuh sakit lalu barangnya wan buaya maka pancat..

(Kada katanahan utuh wan amat bukah,imbah dipos tamandak buahannya)

Utuh:haduuh,manggah haaku gila banar sheila, kawan maka buaya..(Manggatar batis)

Amat:hiiih liwarram,kabubungasan rupa maka buaya di ulah kawan..

(Datang abah ijum)

Abah ijum:wuiih muha pinanya imbah makan nyaman ni,kada babawaan..

Utuh:(takalipik)mauk jua sabut nyiur ni,datang datang bapandir luput..

Amat:muha pucat nang kaya ini batis manggatar,maka dipadahakannya imbah makan nyaman,asli gila ..(Takicing)

Abah ijum:beuh iyakah,kanapa jadi pucat garang..

Amat:imbah malihat buaya kaiai..(Sarik)

Abah ijum:(takalipik)lingu amat nih mangiyau aku kai,lapah ayamnya wan buaya haja takutan..

Amat:gaya kimpus nih,situ wani garang..

Abah ijum:beuh jangankan buaya,dinosaurus ada dihadapanku,kubawa badum..(Agak)

Utuh:kisah wani kimpus nih..

Abah ijum:amun sakadar buaya haja nangapa ditakutanakan, aku mandi disungailah,buaya malihat aku mandi,baparak manyabunakan awakku banarai,pancat kalu ku jantik dihidungnya..(Liwar agak)

Amat:jangan banyak pandir kimpussai,kaina esuk umpat kami mandatangi sheilanya..

Abah ijum:wah ukii, umung umung kaya apa tuh kandaraan servisanku ukii kalu..(Agak)

Utuh:uki nangapa,tu di bingkil,kada sing hidupan lalu,handak dipakai tulak sakulah tadi,rapai kabulaturnya..(Masam muha)

Abah ijum:beuh iya gerang..

Amat:tukang servis payung dibawa manyervis kandaraan,mana manyambung, makanya mun kada ahli jangan cuba cuba terjun ka bidang nang kada dikuasai iya luput..(Sarik)

Utuh:ayu mat kita bulikan,esok kita atur pertemuan wan sheila,kita datangi kerumahnya,kita bawa kimpus nih bujuranlah wani wan buaya..

Amat:ukiii..

(Bulikan buahannya,kaya apa perjuangan utuh wan amat dalam pedekate wan sheila nang hobby wan binatang buas,bila dikatujui ulun sambung ke season selanjutnya)


Penulis

Fendi ramanda