Kisah gasan renungan kita tangah malam haja nah, mungkin kisah nang handak julak posting nih sudah suah tadahulunya, mungkin jua Kowalovers ada tabaca dimana kah, paling ada kalainan pada susunan kata-katanya haja. Tapi kada usah dibahas asal muasalnya nang penting tu isi wan makna inspirasinya.
PASAN ABAH GASAN ANAKNYA DI FACEBOOK
Duduk di hadapan laptopnya, lalu login facebook.
Pertama kali nang dilihatnya adalah inbox.
Malihati sesuatu nang kada suah-suah diheraninya salawas ni. Bagian ‘OTHER’ di
inboxnya, ada dua pesan. Pesan pertama, spam. Pesan kedua, inya mambukanya. Sakalinya ada pesan dari 5 bulan yang lalu, di bacanya isi pesan tadi:
ASSALAMUALAIKUM WR.WB
Ini pertama abah mancuba mamakai facebook. Abah cuba tambah ikam sebagai kawan tapi kada bisa. Abah jua kada talalu paham. Abah cuba kirim pesan gasan ikam. Maaf, abah kada pintar mangetik. Ini gin kawan abah yang malajari.
Anak abah, ingat lah ikam pamulaan baisi HP? Waktu itu ikam kalas 4 Madrasah. Abah kasian sabarataan kawan ikam baisi HP. Jadi, abah hadiahkan gasan ikam HP. Kahandak abah ikam bisa manilpun abah amun ikam handak bakisah masalah asrama, sekolah atawa nang lainnya ai.
Tapi, ikam manilpun abah saminggu sakali haja. Itu gin batakun duit gasan makan lawan gasan balanja.
Abah isi pulsa 100 ribu tapi manilpun abah kada sampai 5 manit. Sudah habiskah pulsanya?
waktu ikam halus dulu, abah masih ingat pertama kali ikam bisa bapandir. ikam asyik mangiyau, ‘Abah, abah, abah’. Abah Bahagia banar anak lalaki abah mangiyau abah. Mangiyau mama.
Abah bahagia bisa bapandir lawan ikam
walaupun ikam mungkin kada ingat dan kada paham apa yang abah pandir akan di umur ikam 4 atau 5 tahun. Tapi, parcayalah. Abah lawan mama ikam bapandir wan ikam banyak banar.
Ikam nang mahibur kami waktu kami kasunyian. Biar lawan tatawa haja ikam kami marasa sanang banar sudah.
waktu ikam masuk Madrasah. Abah ingat ikam rancak bapandir wan abah waktu mambawa sapida mutur wan abah bila baisukan lawan bulik sekolah.
Banyak yang ikam kisah akan lawan abah. Kisah ibu guru, sakulahan, kawan-kawan ikam.
Abah jadi makin basamangat bagawi
mancari duit gasan ungkus ikam sakulah. Ulihh ikam pintar banar. abah mana yang kada bahagia amun anaknya suka sakulah gasan balajar?
Waktu ikam lulus lalu masuk MTs. ikam mulai baisi kawan-kawan hanyar. Ikam bulik matan sakulah, ikam langsung masuk kamar.
ikam kaluar pas waktu makan haja. ikam kaluar rumah lawan kawan-kawan ikam.
ikam mulai jarang bapandir wan abah.
ikam akhirnya masuk asrama di Aliyah. Di asrama, jarak antara kita makin jauh. ikam mancari kami bila parlu. ikam biarkan kami saat kada perlu.
Abah tahu, jiwa muda. Abah gin suah jua anum, sikap ikam sama haja wan
waktu di MTs. Jarang mahubungi kami. Waktu bulik liburan, ikam haur wan HP ikam, wan laptop ikam, wan internet ikam, wan dunia ikam.
Abah bapikiran dalam hati.
Ada kawan istimewa nang labih panting kah dari abah wan mama ikam?
Abah wan mama ikam ni diparlukan waktu ikam handak nikah haja kah sabagai pambari restu?
Atawa kami nih ibarat tabungan ikam haja kah?
Akhirnya, ikam jarang bapandir wan abah mama lagi.
Mun handak bapandir, palingan pakai bahasa tulisan sms. batamu tapi kada barkata-kata. bapandir tapi kaya kada basuara. Bataguran waktu hari raya ja. batakun sabatik, dijawab sakata. Ditagur, ikam buang muha. disariki, ikam kada tatahu.
Malam ini, abah sabujurnya rindu, rindu banar lawan ikam. kadanya handak sarik atawa mangungki-ungkit masa lalu. Cuma abah sudah talalu tuha. Abah sudah di hujung umur 60 an. Kakuatan abah kada kaya dahulu lagi. Abah kada minta banyak…
Kadang-kadang, abah tu handak ikam haja ada di higa abah, bapandir masalah hidup ikam. Maungkap akan apa haja nang salawas ni ikam pandam di hati ikam.
Manangis lawan abah. Maadu lawan abah.
bapandir lawan abah kaya ikam waktu halus dahulu.
Apapun. Maafkan abah atas curhat abah ini. Jagalah solat. Jagalah hati. Jagalah iman. Mungkin ikam kada baisi waktu bapandir lawan
abah. Namun, jangan sampai ikam kadada waktu bapandir wan Allah.
Jangan bamandak cinta di hati lawan sasaurang malabihi cinta kapada Allah.
Mungkin ikam maabaikan abah. Namun jangan ikam maabaikan Allah.
Maaf akan abah atas sagalanya.
Pamuda itu manitikan banyu matanya. Dalam hati padih kada takira. Kayapa kada, tulisan abanya itu dibaca sasudah 3 bulan sidinm maninggal dunia.
dingsanak, hargailah kuitan kita di waktu sidin masih hidup... kadangkala kita talalu sibuk lawan gawian kita, sakulah, kuliah, bahkan bapacaran, batunangan.
Sampai kita kada ingat sidin nang manganali kita.
Memberi kita pendidikan gasan kita bagawi malajari cara berjalan supaya kita bisa hidup, baaktivitas.
Jangan sampai anak kita kaina sampai kada ingat lawan kita nang kaya kita kada ingat wan kuitan kita.
Salamat malam, salamat bagadang bagi nang bagadang, salamat manunggu sahur.
salam by Julak FDj
0 komentar:
Posting Komentar