Renungan gasan lalakian sabalum kita basahur.
"RIDHO BINI"
Di tangah malam nang dingin Utuh tabangun, malihat umanya sudah sibuk baharaguan gasan makan sahur.
Utuh : “bamasak apa ma? Ulun dangani lah?”
Uma : “handak manyanga papuyu lawan sambal tumat kasukaan abah ikam”
Utuh : “Alhamdulillah...mantap pasti, sini nah ulun dangani. Eh ma...pacang bini ulun kada bisa bamasak ma ai”
Uma : “Iya imbah tu pang kanapa?”
Utuh : “Ya kada kanapa-kanapa ai, bakisah banar ai, hehehe”
Uma : “Jangan dipikir bamasak, batatapas, basasapu, maurus rumah, wan sagala macam lainnya tu kawajiban bibinian”
Uma : “Hahhh..Maksud pian ngintu kawajiban lalakian kah? Tapi kanapa maka pian nang manggawinya tiap hari?
Uma : “Kawajiban bini adalah taat wan laki. Karna abah ikam kada mungkin kawa maurusi rumah maka mama mambantui maurusinya. Sabagai wujud cinta wan jua mancari ridho laki”
Utuh : "Makin bingung ulun nah ma ai. Maka kawajiban laki tu manafkahi bini? Baik sandang, pangan, wan papan”
Uma : “Nyata haja ah...Menurut kam pengertian nafkah tu nang kayapa? Pakaian nang barasih adalah nafkah. Jadi batatapas adalah kawajiban laki. Makanan adalah nafkah.Mun baras tu masih satangah nafkah karna balum kawa dimakan. Jadi bamasak adalah kawajiban laki. Imbah tu rumah adalah kawajiban laki. Jadi kabarasihan rumah adalah kawajiban laki jua”
Utuh : “homaaaaa maaaaa...sampai kaya itu lah ma? Mun tu barataan kawajiban laki. Kanapa pian tatap ja manggawinya, kada manuntut abah sakakali?
Uma :“Karna mama ni bini nang mancari ridha matan laki, mama jua mancari
pahala supaya salamat di akhirat sana. Karana mama cinta wan abah ikam, mana mungkin mama purun manyuruh abah ikam nang hanyar datang bulik bagawi manggawi tugas ngintu pulang. Mun abah ikam banyak duit mungkin pambantu kawa jadi solusinya. Tapi mun balum kawa, ini adalah ladang pahala gasan mama. Suah lah mandangar kisah fatimah nang maminta pambantu wan Nabi karna tangan sidin bangkak mambiru bakas manumbuk galapung? Nabi kada manulusakannya. Atawa suah lah mandangar jua sayyidina Umar
digarunumi bininya? Sidin bahinip ja karna tahu dasar bujur. Bibinian kacintaannya sudah manggawi macam-macam nang sabujurnya tu lain tugasnya.
Tapi karna patuh wan taatnya binian, barataan ridha digawinya“.
Utuh : ”Inggih ma...Jadi laki-laki salawas ini salah sangka ma lah? Saharusnya laki batarimakasih wan bininya. Labih sayang wan labih mahurmati pengorbanan bini.”
Eh...imbah pang kanapa pian tatap hakun ma padahal lain kawajiban pian?”
Uma : “Manikah kada hanya sual manuntut hak mama atawa manuntut kawajiban abah ikam. Tapi banyak hal lain. Manurunkan ego, manjaga kaharmonisan, mangalah, kerjasama, kasih sayang, cinta wan jua persahabatan. Manikah tu baadu balomba saling bausaha mambaiki akan satu sama lain. Nang bini sabaik mungkin mambantu lakinya, nang laki sabaik mungkin mambantu bininya. Cita-citanya barumah tangga sampai surga kalu?”
Utuh : “Subhanallah...mun pacang bini ulun tahu ini, lalu inya kulir bagawian apa-apa kayapa ma?”
Uma : “binian baagama tantu tahu haja bahwa inya harus mancari ridho lakinya. Kada mungkin pang sapurun itu. Nah mun lakian baagama sudah tantu tahu bahwa bininya sudah banyak mambantu.
Sahingga kadada cara lain salain labih
mancintainya.
Sudah gin, kadada habisnya mun dikisah akan tarus...panat mamicik kipit hp julak.
Mudahan nang mambaca, nang maaminakan, nang manyukai, nang mambagiakan dibarikan laki/bini nang shaleh/shalehah, kaluarga sakinah mawaddah wa rahmah, salamat di dunia di akhirat masuk syurga lawan para
nabi, auliya wan shalihin...
Amin amin ya rabbal'alamin.
Salamat malam, salam by Julak FDj
0 komentar:
Posting Komentar